تفاصيل الأبليكشن :

هو ابليكشن شوبينج اونلاين للناس اللى بتطلب اوردرات وبتقفل تليفونها لما الدليفرى يكلمها او تتعب وتدخل المستشفى فجأه او حد يموت عندها فى نفس ذات وقت توصيل الأوردر او تتفاجئ انها كانت مسافره لمقر الأمم المتحده علشان تفض النزاع بين السنجاب البرى والقنفد البحرى, أو يجيلها إحساس انها مش عاوزه الأوردر خلاص وتطلب تكنسله واظن هما عارفين نفسهم وحاسين باستهبالهم واستعباطهم.

ادخلى طلعى طاقة الشوبينج اللى عندك بدون ماتدفعى مليم وارحمى الناس اللى شغاله اونلاين من أوردراتك الفشنك - فكرة الأبليكشن انتى هتشترى كل اللى انتى عاوزاه وتطلبى الأوردر واحنا مش هنوصله - انتى هتعملى نفسك بتشترى واحنا هنمثل اننا بنبيع.

 هو كان فيه اسامى تانيه بس اخترت الزريبه لإنه مستوحى من الحياه ومعاملات وطباع ناس كتير. وكمان علشان اللى يدخل الموقع او الابليكشن ميحسش بالغربه ويحس إنه فى بيته ومطرحه.